اسلام آباد۔11اپریل(اے پی پی)ارکان پارلیمنٹ 1973 دے متفقہ آئین تے ذوالفقار علی بھٹو شہید سودھے سارے اکابرین کوں خراج عقیدت پیش کریندے ہوئیں آکھیے جو ایں آئین دی پاسداری تے ایندے تے قائم رہݨ وچ ہی ملک تے جمہوریت دی بہتری تے پائیداری اے،اللہ کرے اے آئین قائم ودائم رہے اتے ایندی چھاں تلے اساں آپݨے فرائض ادا کریندے ہوئیں عوامی مسئلے حل کریندے رہوں ، آئین تے عمل کرݨ نال ہی ملک ترقی کریسی ۔ آئین پاکستان دی گولڈن جوبلی دی مناسبت نال ”اے پی پی ” نال ڳالھ مہاڑ کریندے ہوئیں مسلم لیگ (ن) دے رکن قومی اسمبلی وحید عالم خان آکھیے شہید ذوالفقار علی بھٹو متفقہ طورتے1973ء دے آئین کوں منظور کرایا، ایندے اچ شامل سارے ارکان ، علماء کرام اتے سیاستدان خراج عقیدت دے مستحق ہن انہاں اچ مولانا شاہ احمد نورانی اتے مفتی محمود سودھے ٻئے شامل ہن جنہاں متفقہ طور تے پاکستان کوں ھک آئین ݙتا تے اڄ وی اساں ایں تے عمل کریندے پیوں تے ایندے تے قائم رہݨ اچ ہی بہتری تے پائیداری اے۔مسلم لیگ (ن) دے رکن قومی اسمبلی سید جاوید حسنین آکھیے قوم کوں 50 سال پہلے ھک متفقہ آئین ملیا ایں کیتے میں ذوالفقار علی بھٹو شہید تے اوں ویلھے دی اپوزیشن کوں خراج عقیدت پیش کرینداں ، خان عبدالولی خان، مولانا مفتی محمود، مولانا شاہ احمد نورانی، محمود علی قصوری انہاں سارے لوکاں محنت تے کوشش نال پاکستان تے پاکستان دے عوام کوں ھک متفقہ آئین ݙتا۔
.jpg)
